الخميس، 7 أكتوبر 2010

أمثال فلاحية

-يعني هو الله بيكولو دار أخوك كاعدين بيشترو كل أرظ ورا الثانية واحنا معناش نسد ديننا للناس؟؟ ولا ناس بتوكل جاج وناس بتوكع بالسياج!

-معكول هاي بنت نجاح؟ أي هاي شكرة وبتجنن! ها الكعك مش من هالعجين!

-أبو رائد مديون ومصطفى كاعد بدورلو على شغل! واحد حامل ذقنه والثاني تعبان فيها!

-هسا إنت فيكي عكل تتدخلي بين حماتك وسلفتك؟؟؟ يا داخل بين البصلة وقشرتها ما ينوبك إلا ريحتها!!!

-شفتي ياختي! عبلة زوجت بنتها للسرسري عودة! كال مكرش كال! يا ماخد الكرد لماله بكره بيروح المال وبيظل الكرد عحاله!

-هي هاي شغلانه يابو وديع الله يصلحك؟ أبنفعش هيك! بدك تعمل شغله اعملها صح! عكول المثل إن عشكت اعشك قمر وإن سركت إسرك جمل!!

-الله يكون بعونهم دار أبو حلمي، فوق ما عليهم ديون أخرى إبنهم انحبس، ياحسيرتي عليهم البيت ضيق والحمار رفاس!

-كال ظليتني أكول ماليش إلا سنية تحللي المشكلة! طلعت لا بتحل ولا بتربط كال بحسب الباشا باشا واثاري الباشا زلمة!

-أما شو بنت أبو فلاح يما ماشطرها! جوا الدار قردة وبرا الدار وردة!

-اسماعين أبيش بي أفرغ من عينه طبخته على النار وعينه على طبخة الجار!

-ودينا مرت أبو جميل عالمستشفى لتلد وظلينا معهم للصبح وما عزموناش على عرس بنتهم الكبيرة! والله سدك إللي كال بعد المعروف ضرب كفوف!

-خذلك الحاج سعدي باع أرظه عشان يزوج إبنه، أي والله ماهي محرزة، كال عكول المثل باع عمارة واشترى حمارة

-يا بني بدك تصون صحابك وإياك تخونهم، بكولك المثل: من خان صديقه احترم عدوه. وأكيد الحكي هاد ما بيرضيك.

-من يوم ما إجت بنت حماي وهي جايبة صاحباتها وكراباتها وماشالله تكول البيت بيتها، صدك إلي كال الدار دار أبونا وأجوا الغربية طحونا.

- ما شاء الله عن إياد فش حد بيكرهو والكل صاحبه، من كثر ما لسانه ملس وحكيو حلو، فعلا من عذب لسانه كثر إخوانه.

ليست هناك تعليقات: